ກະຊວງມໍລະດົກວັດທະນະທຳຂອງອີຣ່ານເປີດເຜີຍວ່າ ແຫຼ່ງໂບຮານສະຖານ ແລະ ອາຄານປະຫວັດສາດຢ່າງໜ້ອຍ 56 ແຫ່ງ ໄດ້ຮັບຄວາມເສຍຫາຍຈາກການໂຈມຕີຂອງສະຫະລັດ ແລະ ອິດສະຣາແອລ ໃນໄລຍະການໂຈມຕີທີ່ຮຸນແຮງ 2 ອາທິດທີ່ຜ່ານມາ.
ວັນທີ 16 ມີນາ 2026 ກະຊວງມໍລະດົກວັດທະນະທຳຂອງອີຣ່ານ ໄດ້ເປີດເຜີຍວ່າ ແຫຼ່ງວັດທະນະທຳ ແລະ ໂບຮານສະຖານຂອງປະເທດຢ່າງໜ້ອຍ 56 ແຫ່ງ ໄດ້ຮັບຄວາມເສຍຫາຍ ຈາກການໂຈມຕີທາງທະຫານຂອງສະຫະລັດ ແລະ ອິດສະຣາແອລ ໃນຊ່ວງສອງອາທິດທີ່ຜ່ານມາ.
ສະຖານທີ່ທີ່ໄດ້ຮັບຜົນກະທົບປະກອບດ້ວຍ ພິພິທະພັນ, ຕະຫຼາດເກົ່າ, ອາຄານລັດຖະການເກົ່າແກ່ ແລະ ມັດສະຢິດປະຫວັດສາດ. ໜຶ່ງໃນສະຖານທີ່ສຳຄັນທີ່ໄດ້ຮັບຜົນກະທົບຄື ພະລາຊະວັງໂກເລສະຖານ ໃນກຸງເຕຫະຣານ ເຊິ່ງເປັນພະລາຊະວັງສະໄໝລາຊະວົງກາຈາ ທີ່ມີຊື່ສຽງດ້ານສະຖາປັດຕະຍະກຳອັນວິຈິດງົດງາມ. ນອກຈາກນີ້ ຍັງມີສະຖານທີ່ສຳຄັນໃນເມືອງອິດສະຟາຮານ ໄດ້ແກ່ ມັດສະຢິດຊາຮ໌ອັບບາດ ແລະ ພະລາຊະວັງເຊເຫລ ໂຊຕູນ ທີ່ສ້າງຂຶ້ນຕັ້ງແຕ່ສະຕະວັດທີ 17.
ອີຣ່ານລະບຸເພີ່ມເຕີມວ່າ ແຫຼ່ງວັດທະນະທຳໃນພາກພື້ນຕ່າງໆ ເຊັ່ນ ເຄີດດິດສະຖານ, ໂລເຣດສະຖານ ແລະ ເຄີດມານຊາຮ໌ ກໍ່ໄດ້ຮັບຜົນກະທົບຈາກການໂຈມຕີເຊັ່ນກັນ.
ທັງນີ້ ການເປີດເຜີຍຂອງອີຣ່ານດັ່ງກ່າວ ເກີດຂຶ້ນທ່າມກາງສະຖານະການສົງຄາມທີ່ທວີຄວາມຮຸນແຮງເຂົ້າສູ່ອາທິດທີ 3 ຫຼັງຈາກການປະທະກັນລະຫວ່າງສະຫະລັດ, ອິດສະຣາແອລ ແລະ ອີຣ່ານ ທີ່ເລີ່ມຕົ້ນຕັ້ງແຕ່ວັນທີ 28 ກຸມພາທີ່ຜ່ານມາ.
