ໃນໂອກາດເຄື່ອນໄຫວວຽກງານຢູ່ແຂວງບໍ່ແກ້ວ, ວັນທີ 8 ມີນາ 2026, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ແລະ ການພົວພັນຮ່ວມມືກັບຕ່າງປະເທດ ພ້ອມດ້ວຍຄະນະ ໄດ້ລົງຕິດຕາມຊຸກຍູ້ ການກໍ່ສ້າງພື້ນຖານໂຄງລ່າງ ແຂວງບໍ່ແກ້ວ ໂດຍສະເພາະ ໂຄງການກໍ່ສ້າງທາງປູຢາງ 2 ຊັ້ນ ແຕ່ຫ້ວຍຊາຍນ້ອຍ ຫາ ຫ້ວຍແອ່ນ (ຂົວຂ້າມນ້ຳຂອງກອນຕືນ) ເມືອງປາກທາ ໂດຍໄດ້ຮັບຟັງການລາຍງານ ຈາກຜູ້ຕາງໜ້າໂຄງງານດັ່ງກ່າວ ຊາບວ່າ: ໂຄງການນີ້ ເປັນເສັ້ນທາງບູລິມະສິດສໍາຄັນ ໃນການຂົນສົ່ງສິນຄ້າ ເພື່ອເຊື່ອມຕໍ່ຫາແຂວງໄຊຍະບູລີ ລົງສູ່ນະຄອນຫຼວງວຽງຈັນ, ເຊິ່ງມີລວງຍາວ 53 ກິໂລແມັດ, ໜ້າທາງກວ້າງ 8 ແມັດ, ປູຢາງ 7 ແມັດ, ມີມູນຄ່າການກໍ່ສ້າງປະມານ 318 ກວ່າຕື້ກີບ ໂດຍແມ່ນກຸ່ມບໍລິສັດ ດວງຈະເລີນ ເປັນຜູ້ຮັບເໝົາກໍ່ສ້າງ, ໄລຍະການຈັດຕັ້ງປະຕິບັດວຽກ 48 ເດືອນ, ໂຄງການເລີ່ມຈັດຕັ້ງປະຕິບັດແຕ່ວັນທີ 3/7/2023 ຫາ 2/7/2027ແລະ ໂຄງການກໍ່ສ້າງປ້ອງກັນຕະຝັ່ງເຈື່ອນ ຈຸດຄຸ້ມມີໄຊສະຫວ່າງ ຫາບ້ານປ່າອ້ອຍ ເມືອງຫ້ວຍຊາຍ, ແຂວງບໍ່ແກ້ວ, ຄວາມຍາວກວ່າ 3 ກິໂລແມັດ.
ໃນໂອກາດກັ່ງກ່າວ, ທ່ານ ຮອງນາຍົກລັດຖະມົນຕີ ໄດ້ມີຄຳເຫັນຊີ້ນຳພາກສ່ວນກ່ຽວຂ້ອງ ເພີ່ມທະວີການຮ່ວມມື ແລະ ປະສານງານກັນຢ່າງໃກ້ຊິດ ເພື່ອດຳເນີນແຕ່ລະໜ້າວຽກ ໃຫ້ສຳເລັດຕາມແຜນການ; ໃຫ້ຄຳນຶງເຖິງຄຸນນະພາບຂອງວຽກງານເປັນຫຼັກ, ມີການຄຸ້ມຄອງ ແລະ ກວດກາຢ່າງເຂັ້ມງວດ ເພື່ອໃຫ້ໂຄງການກໍ່ສ້າງເສັ້ນທາງ ແລະ ຕະຝັ່ງເຈື່ອນ ມີຄຸນນະພາບ, ຖືກຕ້ອງຕາມເຕັກນິກ ແລະ ສາມາດນຳໃຊ້ໄດ້ຍາວນານ.
ຂ່າວ ແລະ ພາບ: ກົມປະຊາສຳພັນ ຫສນຍ.
