ກະຊວງອຸດສາຫະກຳ ແລະ ການຄ້າ ອອກແຈ້ງການ ກ່ຽວກັບການສະໜອງນ້ຳມັນເຊື້ອໄຟ ໃນຊ່ວງໄລຍະຄວາມບໍ່ສະຫງົບໃນພາກພື້ນຕາເວັນອອກກາງ ລາຍລະອຽດດັ່ງລຸ່ມນີ້:
ກະຊວງອຸດສາຫະກຳ ແລະ ການຄ້າ ພ້ອມດ້ວຍກົມກ່ຽວຂ້ອງ, ລັດວິສາຫະກິດນໍ້າມັນເຊື້ອໄຟລາວ ແລະ ບັນດາບໍລິສັດນຳເຂົ້າ ນໍ້າມັນເຊື້ອໄຟ ໄດ້ຈັດກອງປະຊຸມປືກສາຫາລືກ່ຽວກັບຜົນກະທົບຂອງສົງຄາມຢູ່ຕະເວັນອອກກາງ ແລະ ມາດຕະການ, ກົນໄກການກະກຽມຄວາມພ້ອມຮັບມືກັບສະຖານະການດັ່ງກ່າວ ໂດຍໃຫ້ກຽດເປັນປະທານຂອງທ່ານ ຈັນທະບູນ ສຸກອາລຸນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ. ບໍລິສັດທີ່ເຂົ້າຮ່ວມມີ: ລັດວິສາຫະກິດ ນຳໍມັນເຊື້ອໄຟລາວ, ບໍລິສັດ ເປໂຕຣຫວຽດນາມ ອອຍ ລາວ ຈຳກັດ, ບໍລິສັດ ສົມວັນຈະເລີນ ເປໂຕຣລ້ຽມ ຈຳກັດ, ບໍລິສັດ ເອັນທີພີ ການຄ້ານຳມັນເຊື້ອໄຟ ມະຫາຊົນ, ບໍລິສັດ ໂລ ປີໂຕຣລຽມ ຈຳກັດຜູ້ດຽວ, ບໍລິສັດ ປີໂຕເທຣດ ນຳເຂົ້າ ແລະ ສົ່ງອອກ ຈຳກັດ, ບໍລິສັດນໍ້າເຂົ້າ-ສົ່ງອອກ ນໍ້າມັນເຊື້ອໄຟເອເຊຍ ຈຳກັດ, ບໍລິສັດ ນໍ້າມັນເຊື້ອໄຟ ດາລາຈະເລີນ ນໍາເຂົ້າສົ່ງອອກ, ຈຳກັດຜູ້ດຽວ, ບໍລິສັດ ເປໂທຣລີແມ໋ກ ລາວ ຈຳກັດ, ບໍລິສັດ ລັດວິສາຫະກິດ ນໍ້າມັນເຊື້ອໄຟ ວຽງຈັນ ເຂົ້າຮ່ວມ ໃນວັນທີ 2 ມີນາ 2026.
ກອງປະຊຸມໄດ້ມີການປະເມີນສະຖານະການທີ່ອາດຈະສົ່ງຜົນກະທົບຕໍ່ລາຄານໍ້າມັນ ແລະ ການສະໜອງນໍ້າມັນໃຫ້ແກ່ສັງຄົມ ໃນໄລຍະທີ່ເກີດເຫດການຄວາມບໍ່ສະຫງົບດັ່ງກ່າວ ລວມທັງມາດຕະການທີ່ຈຳເປັນໃນໄລຍະສັ້ນ ແລະ ໄລຍະກາງ. ໃນກອງປະຊຸມ ຍັງໄດ້ປຶກສາຫາລື ແລະ ກຳນົດມາດຕະການ ຫຼື ວິທີການ ກ່ຽວກັບທາງເລືອກ ຫຼື ແຫຼ່ງນໍາເຂົ້າອື່ນ ເພື່ອຮັບປະກັນການສະໜອງຄວາມໝັ້ນຄົງນໍ້າມັນເຊື້ອໄຟໃຫ້ແກ່ ສປປ ລາວທັງໃນໄລຍະສັ້ນ, ໄລຍະກາງ ແລະ ໄລຍະຍາວ.
ຈາກຂໍ້ມູນການນໍາເຂົ້ານໍ້າມັນເຊື້ອໄຟໃນມື້ນີ້ ວັນຈັນ 02/03/2026 ເຫັນວ່າ ຍັງມີຈຳນວນປົກກະຕິທັງດ້ານປະລິມານ ແລະ ລາຄາ ຫຼາຍກວ່າ 10 ລ້ານລິດ, ຊຶ່ງ ຈາກການປະສານງານກັບ ຝ່າຍໄທ ປະກົດວ່າ ບໍ່ມີການຫ້າມສົ່ງອອກນໍ້າມັນເຊື້ອໄຟ ມາຍັງ ສປປ ລາວ ເນື່ອງຈາກ ການຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນທີ່ເລິກເຊິ່ງໜັກແໜ້ນຂອງທັງສອງປະເທດ ລາວ-ໄທ ທາງທັງດ້ານພະລັງງານ ເຊິ່ງ ບໍ່ພຽງແຕ່ນໍ້າມັນເຊື້ອໄຟ, ໄຟຟ້າ ແລະ ບໍ່ແຮ່ເທົ່ານັ້ນ, ລາວ-ໄທ ຍັງມີການຮ່ວມມື ແລະ ຊ່ວຍເຫຼືອກັນທາງດ້ານການຄ້າ ແລະ ການລົງທຶນ ເຊິ່ງຕິດພັນກັບຄວາມຕ້ອງການພະລັງງານ ໂດຍສະເພາະ ນໍ້າມັນເຊື້ອໄຟອີກດ້ວຍ.
ພ້ອມນັ້ນ, ຈຳນວນນໍ້າມັນເຊື້ອໄຟທີ່ແຮຮອງໄວ້ຂອງແຕ່ລະບໍລິສັດ ແມ່ນ ສາມາດຕອບສະໜອງກັບຄວາມຕ້ອງການຂອງສັງຄົມໃນໄລຍະໜຶ່ງ ຊຶ່ງບໍ່ກໍ່ໃຫ້ເກີດການຂາດແຄນກະທັນຫັນ. ພ້ອມນັ້ນ, ໃນທີ່ປະຊຸມ ຍັງໄດ້ເນັ້ນໜັກ ແຈ້ງໃຫ້ ບໍລິສັດນໍາເຂົ້າ ແລະ ບໍລິສັດຈຳໜ່າຍ ທີ່ມີປໍ້າຕົວແບບ ແລະ ປໍ້າຕົວແທນທີ່ໃຊ້ໂລໂກ້ຂອງຕົນ ຕ້ອງໄດ້ໃຫ້ບູລິມະສິດໃນການສະໜອງນໍ້າມັນໃຫ້ປໍ້າກ່ອນຢ່າງພຽງພໍ ແລະ ທົ່ວເຖິງ ກ່ອນການສະໜອງໃຫ້ແກ່ ໂຄງການ, ແລະ ແຈ້ງໃຫ້ເຈົ້າໜ້າທີກວດກາການຄ້າ ໃນແຕ່ລະເມືອງ ໃຫ້ລົງຕິດຕາມກວດກາປໍ້າທີ່ປິດ ຫຼື ແຈ້ງວ່າໝົດນໍ້າມັນ ເພື່ອກວດກາຕົວຈິງ ເພື່ອຫຼີກເວັ້ນ ການກັກຕຸນນໍ້າມັນເຊື້ອໄຟ ເພື່ອເກັງກຳໄລລາຄາ. ຖ້າຫາກ ປໍ້າໃດປະຕິບັດ ບໍ່ຖືກຕ້ອງ ໃຫ້ດຳເນີນການປັບໃໝຕາມລະບຽບກົດໝາຍ ໂດຍສະເພາະ ແມ່ນດຳລັດວ່າດ້ວຍ ທຸລະກິດນໍ້າມັນເຊື້ອໄຟ ເລກທີ 559/ລບ, ລົງວັນທີ 9/9/2025 ແລະ ເປັນເຫດຜົນໃຫ້ເກີດການໂຈະ ຫຼື ຢຸດຕິການດຳເນີນທຸລະກິດໄດ້.
ເຖິງຢ່າງໃດກໍຕາມ, ການຊ່ວງເກີດເຫດການຄວາມບໍ່ສະຫງົບທີ່ກ່າວມາຂ້າງເທິງນັ້ນ ເປັນພຽງເຫດການຊົ່ວຄາວ, ການແຕກຕື່ນຊື້ກັກຕຸນນໍ້າມັນເຊື້ອໄຟໄວ້ ແມ່ນວິທີການແກ້ໄຂບັນຫາສະເພາະໜ້າ ແຕ່ບໍ່ແມ່ນວິທີແກ້ໄຂຍາວນານ ແລະ ຍັງສ້າງຄວາມແຕກຕື່ນໃຫ້ກັບ ສັງຄົມ. ວິທີການແກ້ໄຂທີ່ດີສຸດ ຕ້ອງເຂົ້າໃຈວ່າ ສປປ ລາວ ບໍ່ແມ່ນປະເທດຜະລິດນໍ້າມັນ, ການປະຢັດ ແລະ ນໍາໃຊ້ພາຫະນະເທົ່າທີ່ຈຳເປັນ ແມ່ນສິ່ງທີ່ຕ້ອງໄດ້ປະຕິບັດເປັນນິໄສຕະຫຼອດໄປ ຊຶ່ງບໍ່ພຽງແຕ່ເປັນການປະຢັດໃຫ້ແກ່ຕົນເອງ ແລະ ຄອບຄົວ, ຍັງເປັນການປະຢັດເງິນຕາຕ່າງປະເທດໃຫ້ແກ່ປະເທດຊາດ.
