ວັນທີ 24 ທັນວາ 2025, ທີ່ ເມືອງນອງ, ແຂວງສະຫວັນນະເຂດ – ຫ້ອງການຄະນະກໍາມະການຄຸ້ມຄອງເເຫ່ງຊາດ ເພື່ອເເກ້ໄຂບັນຫາລະເບີດບໍ່ທັນເເຕກ ທີ່ຕົກຄ້າງຢູ່ ສປປ ລາວ (ຫ້ອງການ ຄຊກລ) ເເລະ ອໍານາດການປົກຄອງແຂວງສະຫວັນນະເຂດ ໄດ້ຈັດການທໍາລາຍລະເບີດບໍ່ທັນແຕກ (ລບຕ) ໂບມໃຫ່ຍ ຂະໜາດໃຫຍ່ ນໍ້າໜັກ 500 ປອນ (ປະມານ 226.7 ກິໂລກຼາມ) ທີປະຊາຊົນພົບເຫັນຢູ່, ເມືອງນອງ, ແຂວງສະຫວັນນະເຂດ ເມື່ອວັນທີ 05 ທັນວາ 2025 ຢູ່ໃກ້ກັບເຂດຊາຍແດນ ລາວ-ຫວຽດນາມ ໄດ້ຢ່າງສໍາເລັດຜົນ ແລະ ປອດໄພ.
ການທໍາລາຍລະເບີດໂບມໃຫ່ຍຄັ້ງນີ້ແມ່ນໄດ້ຊ່ວຍລົບລ້າງໄພຂົ່ມຂູ່ຢ່າງມີປະສິດທິຜົນ, ເຮັດໃຫ້ພື້ນທີ່ດັ່ງກ່າວມີຄວາມປອດໄພສໍາລັບການນໍາໃຊ້ໃນການກະສິກໍາ ແລະ ການພັດທະນາໂຄງລ່າງພື້ນຖານຂອງຊຸມຊົນ.
ອໍານາດການປົກຄອງແຂວງສະຫວັນນະເຂດໄດ້ກ່າວວ່າ: “ການລາຍງານຢ່າງວ່ອງໄວຂອງປະຊາຊົນ ແລະ ການປະສານງານທີ່ວ່ອງໄວ ລະຫວ່າງ ທ້ອງຖິ່ນ ກັບ ສູນກາງ ແມ່ນມີຄວາມສໍາຄັນຢ່າງຍິ່ງໃນການປ້ອງກັນບໍ່ໃຫ້ເກີດອຸບັດຕິເຫດຈາກ ລບຕ ທີ່ອາດຈະເກີດຂຶ້ນ ທັງເປັນບາດກ້າວທີ່ສໍາຄັນໄປສູ່ການບັນລຸເປົ້າໝາຍແຫ່ງຊາດໃນການເກັບກູ້ ລບຕ ແລະ ປົດປ່ອຍທີ່ດິນໃຫ້ຖືກນໍາໃຊ້ຢ່າງມີປະສິດ ທິພາບ, ເຊິ່ງຈະປະກອບສ່ວນຊ່ວຍປັບປຸງຊີວິດການເປັນຢູ່ຂອງປະຊາຊົນ.
ທີ່ມາ: ຂ່າວສານ ຫ້ອງການ ຄຊກລ
